Naməlum şəxslər TALIŞLARIN evlərini işarələyirlər - EKSKLÜZİV

Cənub bölgəsindən "Vətəninfo.az"a daxil olan məlumata görə bir neçə gündür ki, naməlum şəxslər Lerik, Lənkəran, Astara, Masallı və digər bölgələrdə yaşayan Talış etnik qrupuna mənsub şəxslərin yaşadıqları evlərin divarlarına ay-ulduz şəkilləri çəkirlər. Hələlik bu işarələmənin nə məqsədlə edildiyi bilinmir.

Xatırladaq ki, son günlər İran tərəfi Cənub bölgəsində geniş təbliğat aparır, etnik qarşıdurma yaratmağa çalışır. Bu məqsədlə hazırda Hollandiyada yaşayan separatçı Əlikram Hümbətovla bir neçə dəfə görüş keçirilib. Bu məsələdə Əlikram Hümbətovdan istifadə edilməyə çalışırlar.

Sözügedən faktla bağlı Daxili İşlər Nazirlinin şöbə rəisi Orxan Mansurzadə ilə əlaqə saxladıq. O. Mansurzadə bildirdi ki, bu məlumatın heç bir əsası yoxdur:

"Bu məsələdə məqsəd Azərbaycan türkləri ilə Talış etnik qrupunun arasında nifaq salmaq ola bilməz. Hilal və ulduzun müsəlman dünyasında xüsusi yeri var. Nəzərə alaq ki, Cənub bölgəsi də dinə çox bağlı bir ərazidir. Hansısa uşaq divara ay-ulduz şəkli çəkibsə, bunu başqa mənaya yozmaq lazım deyil. Bizdə olan məlumata görə, bu hal kütləvi deyil və kimlərsə tərifindən təşkil olunmur".