Qəza törətdi, 7 adam yaralandı, 7 il iş aldı

Bu gün Bakı Ağır Cinayətlər Məhkəməsində Quba-Xaçmaz yolunun 5-ci km-liyində ağır yol qəzası törətməkdə ittiham olunan Xaçmaz rayon sakini, 1976-cı il təvəllüdlü Etibar Abdullayevin cinayət işi üzrə məhkəmə istintaqı yekunlaşıb.

Hakim Əhməd Quliyevin sədrliyi ilə keçirilən prosesdə hökm oxunub. Hökmə görə, E.Abdullayev 7 il müddətinə azadlıqdan məhrum edilib. O, məhkəmə zalında həbs olunub.

Qeyd edək ki, hadisə bu il mart ayının 24-də axşam saatlarında Quba-Xaçmaz yolunun 5-ci km-də, Xaçmaz rayonu ərazisində baş verib.

Xaçmaz rayonu, Ağyazı-Buduq kənd sakini, 1964-cü il təvəllüdlü Məmmədmövsüm Həbibovun idarə etdiyi 10 GB 702 dövlət nömrə nişanlı, "VAZ-2107” markalı avtomobillə Xaçmaz rayonu, Mollabürhan kənd sakini, 1976-cı il təvəllüdlü Etibar Abdullayevin idarə etdiyi 40 BK 187 dövlət nömrə nişanlı, "Opel” markalı maşın toqquşub.

Nəticədə hər iki sürücü və Etibar Abdullayevin idarə etdiyi avtomobildə olan sərnişinlər - Xaçmaz rayon Çuxuroba kənd sakinləri, 1983-cü il təvəllüdlü Güldanə Babayeva, 2008-ci il təvəllüdlü Luminə Babayeva, 2014-cü il təvəllüdlü Səma Babayeva, 2009-cu il təvəllüdlü Aysel Babayeva və 1985-ci il təvəllüdlü Hakim Babayev ağır xəsarət alıb. Yaralılar Xaçmaz Rayon Mərkəzi Xəstəxanasına çatdırılıblar.

Virtualaz.org