Rusiyada azərbaycanlı 11 il azadlıqdan məhrum edildi

Azərbaycanlı Rusiyada həbs olunaraq, 11 il azadlıqdan məhrum olunub.

Vizual.az xəbər verir ki, Azərbaycandan olan narkotik alverçisi Krasnoyarska külli miqdarda narkotik keçirərkən saxlanılıb. Məlum olub ki, həmyerlimiz narkotiki Krasnoyarska Özbəkistandan keçirib.

Azərbaycanlı bu ilin mart ayında Krasnoyarskın Oktyabr rayonunda qarajların birində gizli şəkildə içərisində narkotik vasitə olan həşiş paketləri çıxararkən Rusiya Federasiyasının Federal Təhlükəsizlik Xidmətinin (FTX) əməkdaşları tərəfindən tutulub.

FTX-dan verilən məlumata əsasən, xidmətin əməkdaşları şübhəli şəxsin üzərindən 10 kiloqram heroin, 2 kiloqram həşiş aşkar edərək götürüblər. Əldə olunan heroin və həşişin ümumilikdə dəyəri 30-40 milyon rubl ( 500-700 min manat -red.) civarında hesablanıb.

Bundan əvvəl də mühakimə olunan azərbaycanlıya Rusiya Federasiyasının Cinayət Məcəlləsinin 228.1 maddəsi ilə cinayət işi açılıb. Tutulan şəxs 11 illik azadlıqdan məhrum olunub. O, cəzasını xüsusi rejimli cəzaçəkmə koloniyasında çəkəcək.

Ötən gün isə üç azərbaycanlı gənc keçən il Rusiyada polis əməkdaşını döyərək öldürdüklərinə görə, məsuliyyətə cəlb olunub.