Şamaxinkadakı əsas parkinq ləğv edildi - Foto

 

Paytaxtın Moskva prospektində, "Şamaxı yolu” deyilən ərazidə yerləşən avtomobil tunelinin üzərindəki parklanma yeri ləğv edilib.

Azəryolservis ASC-dənVizual.az-a verilən məlumata görə, parkinqin ləğv edilməsi istiqamətində işlər baş verə biləcək bədbəxt hadisələrin qarşısının alınması üçün həyata keçirilib.

Bu qərar Azəryolservis ASC və Bakı Şəhər İcra Hakimiyyəti ilə birgə razılaşdırılıb. Artıq sözügedən ərazidən park edilmiş nəqliyyat vasitələrinin əksəriyyəti çıxarılıb.

Tunelin üzərində qalmış 4 nəqliyyat vasitəsinin sahibi də tapılandan sonra əraziyə giriş Azəryolservis ASC tərəfindən tamamilə bağlanacaq. Bunun üçün köhnə səki daşlarının yerinə daha hündür yeni səki daşlarının düzülməsi işi aparılacaq.

Hələliksə parkinqə nəqliyyat vasitələrinin daxil olmasının qarşısı müvəqqəti olaraq beton maneələrlə alınıb. Bu cür addımların parkinq üçün hesablanaraq inşa edilməyən bütün avtomobil tunellərinin üzərində aparılması nəzərdə tutulub.

Lakin qanunsuz parklanma yerləri təkcə avtomobil tunellərinin üzərində deyil, həmçinin yol ötürücülərinin alt hissəsində də mövcuddur.

Bu cür parklanma yerləri həm əhaliyə, həm də şəhərin yol-nəqliyyat infrastruktuna təhlükə yaradır. Bu üzdən həmin ərazilərdə də duracaqların ləğvi aparılacaq.