Tədqiqat işləri uğurla davam etdirilir

Rusiya Elmlər Akademiyasının Vladivostok (Uzaq Şərq) Botanika Bağı-İnstitutunun laboratoriya müdiri Yevgeni Boltenkov və Dağıstan Respublikasının Dağüstü Botanika bağının laboratoriya müdiri Ramazan Murtazaliyev Azərbaycan Milli Elmlər Akademiyasının (AMEA) Botanika İnstitutunda olublar.
Bu elm müəssisəsinin direktoru, AMEA-nın müxbir üzvü Validə Əlizadə ilə görüşən qonaqlar səfərlərinin əsas məqsədinin Böyük Qafqazın bəzi ərazisində ilkin yaz florasının və rast gəlinən İris növlərinin öyrənilməsindən ibarət olduğunu söyləyiblər.
Səfər çərçivəsində rusiyalı alimlər Botanika İnstitutunun Herbari laboratoriyasında təyinat işləri aparıb və 32 İris cinsinin tip nümunələrini müəyyən ediblər.
Rusiyalı botaniklər və institutun ali bitkilərin sistematikası şöbəsinin müdiri Vüqar Kərimov Azərbaycanın şimal-şərq rayonlarında, xüsusilə, Beşbarmaq dağı, Xızı, Altıağac, Quba, Qusar və Xaçmaz ərazilərində müştərək ekspedisiyada olublar. Toplanılmış 60-dan çox bitki növünə aid 100-dək herbari nüsxəsi Botanika İnstitutunun Herbari Fonduna təhvil verilib.

AZƏRTAC