Jurnalistika bir peşə kimi yaranandan onun əsas prinsiplərindən biri hadisələri gerçək və obyektiv işıqlandırmaq olub. Ancaq bu gün, xəbərin az qala səsdən iti sürətlə yayıldığı  XXI əsrdə Azərbaycanda bəzi mətbuat orqanlarının bilərəkdən yalan, baş verməyən, sadəcə kimlərinsə düşündüyü hadisə haqqında informasiya yayması cəmiyyətdə demokratiyanın əsas dəyərlərindən olan  söz azadlığına böyük zərbə vurur, ictimaiyyət arasında onun vacib olub-olmaması haqqında suallar ortaya qoyur.

 

Saxta yalanların və şaiyələrin yayılmasının qədim formalarından biri qarı nənələrin cəmiyyətin daha gur yerlərində məqsədli yalan xəbərlər dolaşdırmaları olub. Onların qeybətləri, şaiyə və saxta reallıqları yayması bəzən cəmiyyətdə elə bir ajiotaj yaradırmış ki, hökumət də məcbur qalıb ya onları qanun qarşısında məsuliyyətə cəlb edərək dəmir barmaqlıqlar arsında cəmiyyətə nümayiş etdirirdi, ya da şəhərdən, ölkədən qovurdu. 

Bizim bəzi mətbu orqanlarımız indi hətta qədimdə yaşamiş qarıları da geridə qoyur, daha çirkin və qorxulu işlərə əl atırlar. Onlar dövlət orqanlarının ifşa etdikləri hakimiyyət əleyhinə olan cinayətlərin uzun sürən istintaqından və söz azadlığından sui-istifadə edərək, bilərəkdən üzdə olan bir çox nüfuzlu adamların, tanınmış şirkətlərin və onların rəhbərlərinin bu cinayətlərlə bağlı olması haqqında yalan informasiyaları dövriyyəyə buraxır və bundan öz çirkin niyyətlərinə çatmaq üçün istifadə etməyə çalışırlar. Bu taktiki sxem ya redaksiya rəhbərlərinin özü tərəfindən hazırlanır, ya da onlara müəyyən dairələr tərəfindən, əvəzi ödənilməklə sifariş verilir. Belə adamlarin adı klassik mətbuatda o zamanlar "cadugər ovu” adlanırdı və indi də belə olaraq qalır.

Xatırlayırsınızsa, cəmisi beş-altı ay bundan əvvəl bir sıra mətbuat orqanları MTN olaylari ilə bağlı  daha kimləri ağ yuyub qara sərmədilər. Əgər dövlət, Allah göstərməsin, bu mətbuat orqanlarının yazdıqlarına  inanıb hər hansı addım atsaydı, cəmiyyətdə hansı ajiatajın yarandığını təsəvvür etmək belə çətin olardı...  

İndi bəzi mətbuat orqanları üçün "cadugər ovuna” yeni bir fürsət yaranıb. Qardaş Türkiyədə baş verənlər və hadisələrin arxasında FETÖ-çüların durduğu bəlli olandan sonra, Azərbaycan mediasının "şantajçılar” dəstəsi özlərinə xas olan taktikanı yeni bir inersiya ilə işə salıblar. Heç Türkiyədə istintaqın gedişini gözləmədən belə, bu mətbu orqanlar ən müxtəlif versiyalarla kimə desən FETÖ adı qoymağa hazırdır. 

Məni bir jurnalist kimi narahat edən odur ki, əksər hallarda bu kampaniyalara rəhbərlik funksiyasını "Yeni Müsavat” qəzeti öz üzərinə götürür. Ötənləri çox da xatırlamaq istəmirəm, amma bu gün reallıq ondan ibarətdir ki, "Yeni Müsavat”qəzeti , dövlətçiliyə sədaqti ilə seçilən iş adamlarına, biznes aləmində öz mərtəbəsi və nüfuzu olan, yüzlərlə insana çörək verən şirkətlərə  "FETÖ torbası” tikmək layihələrini gerçəkləşdirmək arsusuna düşüb.

Mən, peşə marağından bu qəzeti ara-sira oxuyuram. Ən azından internet vasitəsilə  burada gedən materallara bir peşəkar kimi nəzər salır və illərdir burada heç nəyin dəyişmədiyini görüb təəssüflənirəm. Son hadisələrlə bağlı bu qəzetə bir qədər olduğundan artıq nəzər saldım və əmin oldum ki, bu qəzetdə çalışanların bir qismi hələ də şantajla məşğuldur. Onlara bənzər bir çox mətbuat orqanları da "Yeni Müsavat”dan farağat komandası alaraq, öz alın təri, zəhməti ilə nüfuz qazanan, ehtiram sahibi olan insanlara,  heç bir fakta və mənbəyə əsaslanmadan çamur atıb ləkələməyə çalışırlar. 

Aydın məsələdir ki, işin bir başında sifarışçilər durur. Çünki indi Azərbycanda bəzi media orqanlarının şantaj işini maliyyələşdirən, yəni bu informasiyaları yaymaqda maraqlı olan şəxslər- rəqiblər şəffaf rəqabət aparmaq qabiliyətində olmadıqları üçün bu çirkin vasitələrə əl atırlar. Kommersiya və biznes marağı onlar üçün vicdan və ədalət prinsipini elə geridə qoyur ki,  bazardakı rəqibi hansı damğa ilə desən damğalamağa hazırdırlar. Lap elə ötən əsrin 1937-ci illərindəki kimi.

Qaldı "Yeni Müsavata”, icraçı kimi bu qəzetin materiallarının da böyük əksəriyyətindən sifarişin üfunəti qoxuyur. İfadəyə diqqət yetirin: "Redaksiyamıza daxil olan məlumata görə”... Görünür redaksiya artıq xüsusi xidmət orqanı funksiyasını yerinə yetirir ki, dövlət əhəmiyyətli xəbərlər bura ötürülür. Sadə və bir qədər də bu peşənin incəliklərindən xəbərsiz olan insanlara hesablanmış manevrdir. Yaxşı, deyək biz də bu manevrləri əsas götürüb yazaq ki, "etibarlı mənbələrdən bizə daxil olan məlumatlara görə "Yeni Müsavat” qəzetinin redaksiyasında da FETÖ-çularla gizli əlaqələrdə olan əməkdaşlar var və artıq Türkiyə xüsusi xidmət orqanları bu faktlarla bağlı Azərbaycandakı həmkarlarından bilgi almağa hazırlaşırlar” və s.və i.