Sement maşını dəmir arakəsmələrə çırpıldı – FOTO/VİDEO

"Bakı dairəvi-1" avtomobil yolunun 12-ci kilometrliyində yol qəzası baş verib. Avtomobil qəzası zamanı yol təsərrüfatına ciddi ziyan dəyib.

VİZUAL.az xəbər verir ki, Azəryolservis ASC-nin mətbuat xidmətindən ANS-ə verilən məlumata görə, "Bakı dairəvi-1" avtomobil yolunun Lökbatan dairəsi istiqamətindən şəhərə doğru hərəkətdə olan "Shagman” markalı 90- VU- 596 dövlət nömrə nişanlı sement daşıyan yük maşını yol ayrıcında olan əyri-xətli dəmir tirləri və işıq dirəyini dağıdaraq dayanıb. Hadisə xasarətsiz ötüşsə də dəmir arakəsmələrə ciddi zərər dəyib.

Ağır tonnajlı yük maşınını idarə edən sürücü Rəşad İsmayılovun sözlərinə görə, yük maşınını idarə edərkən sükan arxasında yuxulayıb və bir anlıq idarəetməni itirib. Bu zaman isə qəza baş verib. Nəticədə isə təqribən 100 paqon-metr əyri-xətli dəmir tirlər və 1 işıq dirəyi sıradan çıxıb.

Baş vermiş qəza zamanı yol təsərrüfatına ilkin hesablamalara görə 13 min manata yaxın ziyan dəyib.

Qəza anını əks etdirən foto