Əli Kərimli haqqında açılmayan sirlər – II YAZI
Ötən yazımızda Əli Kərimlinin keçmişi haqda dərc etdiyimiz ilginc faktlar ictimaiyyət tərəfindən maraqla qarşılandı. Söz verdiyimiz kimi, mövzunu davam etdiririk. Amma yeni faktlara keçməzdən öncə bir məqamın üzərində dayanmaq istərdik. Bəziləri Əli Kərimlini ifşa edən bu mövqeni tənqidlə qarşılayır. Buna görə də Kərimlinin yaxın tariximizdə müxalif düşərgəyə xəyanət və separatizm töhfələrinə keçməzdən öncə bir suala cavab verək:
Niyə Əli Kərimli?
Əli Kərimli, onun yaxın siyasi tariximizdəki müxalifətdaxili separatçılığı və xəyanətləri yenə siyasi gündəmin mövzusudur. Son 20 ildə müxalif düşərgədəki siyasi durumdan asılı olmayaraq Əli Kərimlinin mənfi reputasiyası zaman-zaman gündəmə gəlib. Bu şəxsin adı müxalif düşərgədən hakimiyyətlə gizli danışıqlara girən ilk siyasətçidən tutmuş, Milli Azadlıq Hərəkatının Lideri Əbülfəz Elçibəyin zəhərlənməsinə qədər ən ilginc olaylarda hallanıb. Maraq doğuran məsələ odur ki, niyə məhz Əli Kərimlinin adı hallanır? Niyə digərləri yox, məhz Əli Kərimli suçlanır..? Axı, müxalif düşərgənin siyasi komandasında Müsavat Partiyasının başqanı İsa Qəmbər, Klassik Xalq Cəbhəsi Partiyasının sədri, keçmiş millət vəkili Mirmahmud Mirəlioğlu, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev, millət vəkili, baş nazirin keçmiş birinci müavini Əli Məsimli, Milli Məclisin üzvü, Böyük Quruluş Partiyasının başqanı Fazil Mustafa, Demokratik İslahatlar Partiyasının sədri, deputat Asim Mollazadə, Milli Dirçəliş Hərəkatının sədri, millət vəkili Fərəc Quliyev, keçmiş millət vəkili İbrahim İbrahimli və daha hansı tanınmış simalar olmayıb..? Nə üçün təkcə Əli Kərimlinin adı mənfi olaylarla bağlı hallanır? Niyə, İsa Qəmbərin, Mirmahmud Mirəlioğlunun, Pənah Hüseynovun, yaxud Əli Məsimli deyil, məhz Əli Kərimov..? Söhbət təkcə Əbülfəz bəyin zəhərlənməsindən getmir, digər bulanıq, çirkli məsələlərdə də məhz Əli Kərimovun adı həmişə öndə olur. Bunun səbəbi nədir? Əlbəttə, Əli Kərimlinin tərəfdarları o dəqiqə deyəcəklər ki, AXCP sədri daha nüfuzlu, daha yüksək reytinqli olduğu üçün guya iqtidar onu hədəf seçib? Bu arqument tənqidə davamlı deyil. Məgər Əli Kərimli İsa Qəmbərdən və digərlərindən nüfuzludur, populyardır..? Qətiyyən. Bəlkə, Əli Kərimli öz tərəfdarlarının dediyi kimi guya daha ciddi rəqibdir, bəlkə geniş sosial bazası var..? Bu variant da ağlabatan deyil. Çünki 2003-cü ilin prezident seçkilərində Əli Kərimlinin dəstək verdiyi Azərbaycan Milli İstiqlal Partiyası çox aşağı göstərici ortaya qoydu. Deməli, Kərimovun tərəfdarlarının dedikləri həqiqətə uyğun deyil. Ona görə də Əli Kərimlinin suçlanmasının əsas səbəbini məhz özündə axtarmaq lazımdır. Yəni barəsində deyilən bütün mənfi rəyləri cənab Əli Kərimov özü qazanıb.
Köhnə dostlar xəyanətkara çevrildi
Əli Kərimli Azərbaycan Xalq Cəbhəsi Partiyasını xərcləyə-xərcləyə axırına çıxıb, kiçik bir qrup saxlayıb. Bu isə bacarıqlı, nüfuzlu siyasətçi olmaqla bir araya sığmır. Əgər Əli Kərimov öz komandasında olan dəyərli insanlardan, yaxın tələbəlik dostlarından, müəllimlərindən heç birini də qoruyub saxlaya bilmədisə, bunun səbəbini indiki iqtidarda deyil, məhz özündə axtarmalıdır. İqtidar Əli Kərimovun ən yaxın qohumlarından biri, silahdaşı Əliməmməd Nuriyevi onun əlindən necə ala bilərdi..? Əgər Azərbaycan Xalq Cəbhəsi Partiyasının sədri öz tələbə dostları Fuad Mustafayevi, Qüdrət Həsənquliyevi, Fazil Mustafanı, Əli Mustafayevi rəhbərlik etdiyi partiyada qoruyub saxlaya bilmirsə, hansı liderlikdən danışmaq olar..? Yaxud bir vaxtlar "Yurd” birliyinin və Əli Kərimlinin əsas aparıcı fiqurları olan Asim Mollazadənin, Əli Məsimlinin, Qulamhüseyn Əlibəylinin bu gün başqa-başqa təşkilatlarda olmasını nə ilə izah edək? Həm də məsələ yalnız bu şəxslərin AXCP-dən, Əli Kərimlinin rəhbərliyindən imtina etməsində deyil. Adları çəkilənlər Kərimlini bir siyasətçi, dost, insan kimi öz dəftərlərindən siliblər. Bəs bütün bunlara nə ad verək? Axı bu adamların çoxu keçmişin haqq-salamını, duz-çörəyini nəzərə alıb, abırına qısılıb susub. Əli Kərimli isə bütün bunları ayağının altına adıb köhnə dostları xəyanətkar elan etmək üçün bütün təbliğat vasitələrini işə salıb. Amma iş bununla bitmir...
Satqın kimdir, yaxud kor kora kor deməsə...
Əli Kərimli onun kimi düşünməyənlərə, onun ətrafında olmayanlara, onun liderliyini qəbul etməyənlərə "satqın” damğası vurmağa vərdiş edib. Əsl reallıq isə fərqlidir. Çox adi bir fakta nəzər yetirək. AXC hakimiyyəti dövründə bəzi hakimiyyət nümayəndələrinə qanuni mənzil növbələrinə uyğun olaraq mənzil verilmişdi. O cümlədən Əli Kərimova. Hakimiyyət devrilən kimi hakimiyyətdən asılı məhkəmələr vasitəsilə həmin mənzillərin orderləri ləğv etdirildi. O cümlədən Əli Kərimovun da mənzil orderi. Maraqlıdır ki, "hüququna toxunulan 6 nəfərin adlarını yazan (Sabit Bağırov, Vurğun Əyyubov, Qulamhüseyn Əliyev, Əli Məsimov) "Azadlıq" qəzeti orderi ləğv edilmiş Əli Kərimovun adını qeyd etməyi "yaddan çıxarıb". Səbəbi sonradan məlum olur. 10 sentyabr 1994-cü il mitinqində həbs olunan Əli Kərimovu bir neçə gündən sonra azad etməklə bərabər mənzilini də qaytarırlar. Hazırda Əli Kərimov yeganə "müxalifət" nümayəndəsidir ki, yüksək vəzifə sahibləri ilə birlikdə polis tərəfındən mühaflzə olunan binada yaşayır. Mənzil, bahalı avtomobillər, cangüdənlər, qəzetlər, muzdlu yazarlar dəstəsi... Ölkədə hər şeyə, hətta ad günlərinin keçirilməsinə nəzarət edən bu hakimiyyətin ən sərt dövründə, 1993-cü ildən dəhşətli problemlər içərisində yaşamasına baxmayaraq, repressiyalar altında on minlərlə müxalifətçidən fərqli olaraq bütün bunlara sahib olmaq faktı özlüyündə hər şeyə cavab verir. Hələ o zamanlar mətbuatda Əli Kərimova ünvanlanan "bu imkanlar hardandır?" sualına adətən "dostlarım kömək edir" məzmunlu cavab verirdi. Maraqlıdır, başda Elçibəy olmaqla bütövlükdə Xalq Cəbhəsi və onun üzvlərinin əksəriyyətinin ehtiyaclar içərisində olduğu uzun illərdə Kərimovu Elçibəyə qarşı yazarlar dəstəsi, qəzetlər, təşkilatlar saxlamağa, uzun illər AXC - AXCP-ni zəiflədərək aradan çıxarmağa maddi dəstək verən, yüksək səviyyəli mənzillərlə, cangüdənlərlə, avtomobillərlə, ən məşhur yerlərdə istirahətlə təmin edən bu "dostlar" kimlər idi? Həmin "dostlar”a satılan kim idi?...
Əli Kərimlinin düşmənləri dosta çevirməsi- növbəti saxtakarlıq
Kərimlinin satqın siyahısı kifayət qədər genişdir. Həm də bu siyahıda adlar tez-tez dəyişir. Bu gün Əli Kərimlinin ətrafında "gerçək müxalifçilik” libasına bürünənlərlə dünənki münasibətlərə yenidən nəzər salmaq maraqlı olardı:
İbrahim İbrahimli şantajla qovuldu
AXCP və Əli Kərimlinin əsas təbliğatçılarından biri olan İbrahim İbrahimlini onun ilk qurbanlarından saymaq olar. 4 iyun qiyamından sonra AXC-nin bütün yükünü çiynində daşıyan AXC sədrinin birinci müavini, bütün ruhu ilə Cəbhə ideologiyasına bağlı olan İbrahim bəy qəfildən təşkilatı tərk etdi və onun postunu Əli Kərimli tutdu. İ.İbrahimlinin AXC-dən getməsi haqda lap bu günlərdə Ümid Partiyasının sədri İqbal Ağazadə danışdı:1993-cü ildə ünlü bir müxalifət liderini elə bu gün ünlü deyilən bir müxalifət lideri şantaj etmişdi - bir kasetlə, onun şəxsi həyatı ilə. Biri qadın olmaqla, iki nəfərin səsi yazılmışdı və onunla şantaj olunmuşdu. Bu faciədir. Təəssüf ki, indi özü də, çevrəsi də şantaj olunur. Amma vaxtilə o şantaj etmişdi. Siyasətdə bu cür çirkin oyun qaydasını o tətbiq edib. O zaman şantaj olunan adam təşkilatdan çıxıb getmişdi sonda". İqbal Ağazadə ad çəkməsə də, bir sıra keçmiş hərəkatçılar sosial şəbəkələrdə həmin hadisəni təhlil edib bildiriblər ki, millət vəkili bu sözləri AXCP sədri Əli Kərimli ilə İbrahim İbrahimliyə aid edib. İddialara görə, Əli Kərimlinin təşkilatçılığı ilə o zaman Azərbaycan Xalq Cəbhəsi sədrinin birinci müavini olan İbrahim İbrahimlinin səsi gizli yazılıb və bununla o şantaj olunub. İbrahim İbrahimli də bunun nəticəsində 1995-ci ildə təşkilatı tərk etmək məcburiyyətində qalıb. Aparılan diskussiyalardan o da aydın olur ki, siyasi kuluarlarda belə bir söhbətin baş verməsi uzun müddətdir dolaşır, sadəcə kimsə bunu ictimailəşdirməkdə maraqlı olmayıb".
Oqtay Gülalıyevin partiyadan çıxarılması və gənclərə qarşı sifarişli repressiya
Əli Kərimli artıq AXCP sədrinin birinci müavini olduqdan sonra partiya daxilində ilk separatçılıq mövqeyini və repressiya maşınını AXCP Gənclər Komitəsinə qarşı yönəltdi. Komitənin yaranması prosesində bütün ciddi-cəhdlə qurumu "Yurd”un nəzarəti altına almağa çalışan Kərimli buna nail olmadı. Bakıda baş verən oyunlardan xəbərdar olan Əbülfəz Elçibəy Kələkidən sərəncam yolladı. Bu sərəncamla AXCP Gənclər Komitəsi təsis olundu və Oqtay Gülalıyev sədr təyin edildi. Elə həmin vaxtdan da Əli Kərimli gənclərin təşkilatını hədəf seçdi. AXCP Gənclər Komitəsi Əli Kərimlinin kabinetlərə bağlamaq istədiyi təşkilatı yenidən hərəkatçılıq ruhuna qaytarmaq cəhdi idi. Bu cəhdə qarşı Kərimlinin komandası bütün gücü ilə təbliğati və siyasi hücumlara başladı.
İndi isə diqqət bu faktı yaxşı yadda saxlayın! Bu gün boykotdan danışan Əli Kərimli 1995-ci ildə AXCP-nin seçkilərdə iştirakına etiraz edən Gənclər Komitəsinin sədri Oqtay Gülalıyevi partiyadan xaric etdi. AXCP GK qaragüruh, destruktiv və barışmaz radikalçılar kimi cəmiyyətə təqdim olundu. Həm də hakimiyyətə nişan verən bu təbliğatın nəticəsi özünü çox gözlətmədi O.Gülalıyevin partiyadan azad olunmasından bir müddət sonra AXCP Gənclər Komitəsi sədrinin iki müavini də həbs olundu və məhkəmə hökmü çıxmamış "Azadlıq” qəzeti istintaq altında olan bu gəncləri cinayətkar elan etdi. Bax tarix və fakt budur. Əli Kərimlinin dünəni bundan ibarətdir. Bu gün həm Oqtay Gülalıyev, həm İbrahim İbrahimli Əli Kərimlinin "sevimli”lərinə çevrilib. Yəqin dünəni onların heç biri unutmayıb və həm İbrahim bəy, həm də Oqtay bəy Əli Kərimli yaşda adamların bundan sonra xarakterinin dəyişməyəcəyini başa düşürlər. Dəyişən yalnız bir şeydir: getdikcə ətrafı daralan, tək qalan Kərimli dünənin düşmənlərini müvəqqəti dosta çevirir...
Dostlarını dəyişənin dəyişən simaları
Son illərin tarixi Əli Kərimlinin dəfələrlə tək dostlarını deyil, öz simasını da dəyişməsinin şahidi olub. Gəlin bu məqamları və həmin məqamlardakı məntiqsizliyi bir-bir diqqətdən keçirək:
- 1995-ci ildə parlament seçkilərində iştirakı vacib sayan Kərimli bu gün boykotun düzgün yol olduğunu təbliğ edir (20 il bundan öncənin nə seçki qanunları, nə seçki mühiti bugünki kimi deyildi, bütün problemlərə rəğmən indiki seçki mühiti daha normal sayıla bilər. Bu halda boykotun bu gün, yoxsa 20 il öncə vacib olduğu haqda mübahisə açmaq yersizdir. Ortada yalnız bir məntiq qalır: 1995-ci ildə hakimiyyət Əli Kərimliyə mandat vəd etmişdi və bu mandatı qazanmaq üçün bəhanələr uydurulurdu;
- 1995-ci ildə mübarizəni meydanlardan kabinetlərə daşımağı vacib bilən Əli Kərimli bu gün meydan mübarizəsindən dəm vurur (1995-ci ilin repressiyalarına rəğmən cəmiyyətdə bir hərəkatçılıq ruhu var idi. Ə.Kərimlinin aldığı sifarişlər yalnız AXC-ni AXCP-yə çevirmədi, həm də hərəkatçılığı məhv etdi. Kərimlinin qalstuklu oğlanlar komandası ilə cəbhəçilik psixologiyası bir-birinə zidd idi. Kimə məlum deyil ki, zəhrimar qrantı ölkə müxalifətinə ilk daddıran Əli Kərimov olub..? Müxalifət qranta öyrəşməklə bütün prinsiplərini və cəmiyyət arasındakı nüfuzunu itirdi. Və müxalifət dəyərlər uğrunda deyil, qrant uğrunda mübarizəyə başladı. Bu gün bu qədər sosial narazılıqlar və qanunsuzluqlar fonunda insanların meydanlara çıxmaması elə Əli Kərimlinin 20 il öncə "asta-usta” prinsipi ilə yürütdüyü siyasətin nəticəsidir;
Bütün bunların başında Əli Kərimov dururdu. Hazırda Əli Kərimov öz keçmişində buraxdığı izləri nə qədər təmizləməyə çalışsa da, heç cür alınmır. Və hər dəfə Əli Kərimovun əlavə canfəşanlığı onu daha da dərinə aparır. Öz liderinə xəyanət etmiş şəxsdən cəmiyyətin müsbət nəsə gözləməsi lətifədən başqa bir şey deyil. Onsuz da hər şey cəmiyyətə məlumdur. Sadəcə, bütün bu söz-söhbətlərə son qoymaq, tariximizin yaxın bir kəsiminə nəzər salmaq üçün ədalətli ictimai məhkəmə qərarına ehtiyac var. Onda cəmiyyətin aldanmış və Əli Kərimlidən xilaskar düzəltmək istəyən xırda kəsimi də onun kim olduğunu, hansı əməlin sahibi olduğunu biləcək. Məqsəd kimlərisə ifşa etmək deyil, yaxın tariximizə aydınlıq gətirməkdir.
- AXC-nin AXCP-yə çevrilmə qurultayının nizamnamə pozuntuları;
- Əli Kərimovun Kələki səfərinin ilginc detalları;
- Pənah Hüseynovun AXCP-yə gəlişinə qadağa qoyulmasının səbəbləri;
- AXCP MNTK üzvü, mərhum hərəkatçı Şamil Quliyevin partiyadan kənarlaşdırılması;
- Elçibəyin iştirakı ilə keçirilən AXCP Ali Məclisinin son iclasında baş verənlər
Bu və digər faktlar haqda növbəti yazılarımızda....
cebhe.info
Azərbaycanda həmin gün evlənənlərin sayı rekord vurdu - AÇIQLAMA
Natiq Cəfərli: ““Parlamentdə müxalifətin adı var, özü yoxdur” fikrini bütün partiyalara şamil etmək doğru deyil”
“Hazırda məktəblərdə “TikTok”a çıxış bloklanıb” - Nazir müavini
Uşaqların 42 faizi gecə saat 2-yə qədər telefondadır - Komitə sədri
Deputat: “Radikallar Azərbaycandakı demokratiyaya irad bildirə bilirlərsə, deməli, Azərbaycanda demokratiya var”
Rəsmi Bakı CNN-in yaydığı məlumatları rədd etdi – Bəyanat
"Salamat yeri yox idi, pulqabını meyitin üstünə atmışdı" - Gülüzarın qardaşı
Azər Həsrət: “Cəhalət, xurafat tərəfdarı olanlar nə düşünməyə, nə də sorğulamağa imkan verir”
İqbal Ağazadə: “Qaz, işıq limiti ləğv edilməlidir”
Həbsxanada özünə ad günü edən general - DOSYE
Namiq Hacıheydərlisiz təqvim... 
Nazim Hikmətin salamını almayan Leventə cavabı 
Emil Rasimoğlu: "Xammal olan istənilən mövzu isə cəmiyyətdir, kütlədir" 
SU KİMİ ŞƏFFAF ÖMÜRLÜ İNSAN.. 
Cavid Fərzəli: "Xoşbəxtlik ağ gününə qar olmaqdır..." 
Dustaqlara nə deyərdim? 
Fəlakətin Əsiri 
Ədəbiyyatımızda "GÜLLƏLƏNMİŞ" BAŞ redaktorlar 
Yalnız Qürbətdə Vətənin əclaflığını və soydaşların əclafını da sevmək olur! 
Utanan həbsxana və ya Aydın Canıyevin yandırılmış fotosu... 
Çox qəmə binəsən, gözüm...”– Paşa Talıblı 
Paşa Talıblıdan yeni şeirlər: "Cəllad can seyrinə çıxır..." 
"Allahın altından yer istəmirəm..."— Paşa Talıblıdan yeni şeirlər 
"Şükür, yenə bu nəfəsdə yoruldum..."- Paşa Talıblıdan YENİ ŞEİRLƏR 
İlham Əliyev Monqolustan səfirini qəbul etdi 
Ramiz Rövşən: SON GÖRÜŞ